Qaramada Midoobay oo mar kale kordhisay muddada hawl-galka Amisom.

0
76

New York-(RKGS) Jumciyadda quruumaha ka dhaxaysa ayaa mar kale kordhisay muddada hawl-galka Ciidamada midowga Afrika ee Soomaaliya,waxanay sheegeen inuu socon doono illaa 31-ka May 2017-ka.

Qaraar uu golaha ammaanka meel-armaiyay ayaa lagu sheegay in loo baahan yahay in tirada Amisom laga sare mariyo 22,126-askari, taasoo ay ku sheegeen mid lagu dar-dar-geliyo hawl-galka iyo geeddi-socodka siyaasadda Soomaaliya.

Golaha ammaanka qaraarkan uu diyaariyay ayaa waxa kaloo lagu sheegay in Amisom laga doonayo inay Ciidamada Soomaaliya ku wareejiyaan qaybo ka mid ah hawlaha ay hayaan si ay Ciidamada Soomaaliya awood ugu yeeshaan gudashada waajibaadyadooda ku aaddan sugidda nabad gelyada.

Taliska Amisom, ayaa laga codsaday inuu u dhabbo-galo heerka uu gaarsiisan yahay xiriirka u dhexeeya shacabka ku nool goobaha Al-shabaab laga saaray iyo Ciidamada, si loo xoojiyo wada-shaqeynta labada dhinac.

Golaha ammaanka ee qaramada midoobay ayaa Amisom kula taliyay inay furaan waddooyinka xiran ee muhiimka u ah in shacabka deegaannada la xoreeyay loo gaarsiiyo sahayda iyo gargaarka ay u baahan yihiin, ciidamada AMISOM ee ku suganna loo gaarsiiyo waxyaabaha lagama maarmaanka u ah hawl-galkooda.

Ciidanka Amisom ayaa lagu boorriyay inay ilaaliyaan xeerarka caalamiga ah ee Xuquuqda Aadanaha xilliyada ay dagaallada kula jiraan Al-shabaab, Isla markaana ay si dhaw ula shaqeeyaan xafiiska Xuquuqda Aaadanaha ee Qaramada midoobay (UNSOS).

15-ka xubnood ee Golaha Ammaanka xubnaha ka ah ayaa ugu dambayntii Taliska Amisom waxay ka dalbadeen in baaritaanno lagu sameeyo eedeymaha ciidanka loo soo jeediyo, isla markaana la dhawro xeerarka iyo shuruucda ciidamada iyo kan caalamiga.

LEAVE A REPLY

Please enter your comment!
Please enter your name here